Books, Music, Poetry

MULAQAAT – FAIZ AHMED FAIZ

Yeh raat us dard ka shajar hy,

jo mujhse tujh se azeem tar hy,

azeem tar hy ke iss ki shaakhon,

men laakh mash’al bakaf sitaron,

ke kaarwan, ghitt ke kho gaye hen..

Hazaar mahtaab is ke saaye,

men apna sab noor, ro gaye hen..

Yeh raat us dard ka shajar hy,

jo mujhse tujhse azeem tarr hy..

Magar isi raat ke shajar se,

yeh chand lamhon ke zard patty,

giry hen, aur tere gesuon men,

ulajh ke gulnaar ho gaye hen,

usi ki shabnam se khaamshi ke,

yeh chand qatry, teri jabeen par,

baras ke heery piro gaye hen..

Bohut siyaah hy yeh raat laikin,

isi siyaahi men ro’numa hy,

woh nehr e khoon jo meri sadaa hy,

usi ke saaye men noor gar hy,

woh moj e zarr jo teri nazar hy..

Woh gham jo iss waqt teri baahon,

ke gulistaan men sulag raha hy,

woh gham jo iss raat ka samar hy,

kuch aur tab jaaye apni aahon,

ki aanch men toh yehi sharar hy..

Har eik siyaah shaakh ki kamaan se,

jigar men tooty hen teer jitny,

jigar se nochy hen, aur har ek,

ka hum ne taishaa bana liya hy..

Alam naseebon, jigar fagaaron,

ki subha, aflaak par nahin hy,

jahan pe hum tum khary hen dono,

sehr ka roshan ufak yahin hy,

yahin pe gham ke sharaar khil kar,

shafaa ka gulzaar ban gaye hen,

yahin pe qaatil dukhon ke taishy,

kataar andar kataar kirnon,

ke aatisheen haar ban gaye hen..

yeh gham jo us raat ne diya hy,

yeh gham seher ka yaqeen bana hy,

yaqeen jo gham ke kareen tar hy,

seher jo shab se azeem tar hy..

‘FAIZ

Standard